हङकङमा जारी महिला इमर्जिङ टिम्स एसिया कप टी–२० क्रिकेटमा नेपालले पाकिस्तान ‘ए’ लाई ८७ रनमै अलआउट गरेको छ । मोंग कोकस्थित मिशन रोड ग्राउन्डमा टस जितेर फिल्डिङ रोजेको नेपालले पाकिस्तानलाई १९.२ ओभरमा ८७ रनमा अलआउट गरेको हो ।
पाकिस्तानका लागि शवाल जुल्फिकारले २८, कप्तान फातिमा सानाले १६, सदफ शामसले १२ र गुल फिरोजाले ११ रन बनाए । बाँकी ब्याटरले भने दोहोरो अंकमा समेत रन जोड्न सकेनन् ।
नेपालका लागि बलिङमा इन्दु बर्माले ३ ओभरमध्ये एक मेडन फाल्दै ६ रन मात्र दिएर ३ विकेट लिइन् । यस्तै, कविता जोशी र सीता राना मगरले ४ ओभरमा समान १६ रन कुर्चिँदै महत्वपूर्ण २/२ विकेट हात पारे ।
यस्तै, कविता कुँवरले ३.२ ओभरमा १२ रन दिएर २ विकेट नै लिइन् । थाइल्याण्डले भिसा समस्या देखाउँदै प्रतियोगिताबाट नाम फिर्ता लिएपछि नेपालले पहिलोपटक महिला एसिया कप खेलिरहेको हो । नेपाल आज पाकिस्तानलाई स्तब्ध पार्दै प्रतियोगितामा सुखद सुरुवात गर्न चाहन्छ ।
एसिया कपका लागि हङकङ जानुअघि नेपालले मलेसियाविरुद्धको पाँच खेलको सिरिज ३–२ ले जितेको थियो । एक वर्षपछि अन्तर्राष्ट्रिय क्रिकेटमा फर्किंदै नेपालले सिरिज जितेको हो ।
नेपाली टोली मलेसियामा देखिएका कमजोरी सुधार गर्दै एसिया कपमा प्रतिस्पर्धा गर्ने तयारीमा छ । समूह ‘ए’ मा रहेको नेपालले प्रतियोगिताअन्तर्गत दोस्रो खेल बिहीबार भारत ‘ए’ सँग खेल्नेछ । यस्तै, नेपालले समूह चरणको अन्तिम खेलमा शनिबार हङकङको सामना गर्ने तालिका छ ।
प्रतियोगिताको अर्को समूहमा मलेसिया, यूएई, बंगलोदश र श्रीलंका ‘ए’ रहेका छन् । हरेक समूहबाट शीर्ष दुई टोलीले सेमिफाइनलको यात्रा तय गर्नेछन् । सेमिफाइनल १९ र फाइनल खेल २१ जुनमा हुनेछ ।
नेपालको प्लेइङ–११ : रुबिना क्षेत्री (कप्तान) सीता राना मगर, इन्दु बर्मा, कविता कुँवर, कविता जोशी, अस्मिना कर्माचार्य, कृतिका मरासिनी, विन्दु रावल, अप्सरी बेगम, सम्झना खड्का र ज्योति पाण्डे ।
Comments
Post a Comment