महिला एसिया कपमा श्रीलंकाको विजयी सुरुवात, नेपालको खेल मंगलबार
श्रीलंका ‘ए’ ले महिला इमर्जिङ टिम्स एसिया कप टी–२० क्रिकेटमा विजयी सुरुवात गरेको छ । सोमबार बिहान भएको समूह ‘बी’ को खेलमा यूएईविरुद्ध ३ विकेटको रोमाञ्चक जित निकाल्दै श्रीलंकाले विजयी सुरुवात गरेको हो ।
यूएईले दिएको ९६ रनको लक्ष्य श्रीलंकाले १९.५ ओभरमा ७ विकेटको क्षतिमा पूरा गर्यो । उसका लागि विष्मी गुणरत्नेले २१, इमेषा दुलानीले १५, कौशिनी नुथ्याङ्गनाले १४, निलक्षण सन्दामिनीले १२, मधुसिका मेथ्तानन्दले अविजित ११ र उमाशा थिमेसानीले १० रन बनाए ।
यूएईका लागि इन्धुजा नन्दाकुमार र ईशा ओजाले सर्वाधिक २/२ विकेट लिए । त्यसअघि हङकङको मोङ कोकस्थित मिसन रोड मैदानमा टस जितेर ब्याटिङ रोजेको यूएई १९.३ ओभरमा ९५ रनमै अलआउट भयो ।
उसका लागि ईशा ओजाले ३९, तीर्था सतीशले १६ र खुसी शर्माले १४ रन बनाए । बाँकी ब्याटरले भने दोहोरो अंकमा समेत रन जोड्न सकेनन् ।
श्रीलंकाका लागि मधुसिका मेथ्तानन्दले ३.३ ओभरमा १६ रन दिएर सर्वाधिक ४ विकेट लिइन् । प्रतियोगितामा नेपालले पहिलो खेल मंगलबार पाकिस्तानसँग खेल्नेछ । नेपाल र पाकिस्तानबीचको खेल बिहान ६ः४५ देखि सुरु हुँदैछ ।
थाइल्याण्डले भिसा समस्याका कारण नाम फिर्ता लिएपछि उसको स्थानमा नेपालले मौका पाएको हो । समूह ‘ए’ मा नेपालसहित भारत, पाकिस्तान ‘ए’ र आयोजक हङकङ रहेका छन् ।
समूह ‘बी’ मा बंगलादेश र श्रीलंका ‘ए’ टोलीसहित यूएई र मलेसिया छन् ।
Comments
Post a Comment